Tre persona janë arrestuar pasi në një banesë në Kurbin janë gjetur kanabis dhe armë.
Policia njoftoi se bazuar dhe në informacionet e marra në rrugë operative së në Laç-Kurbin, në një banesë në afërsi të një poligoni kishte armë zjarri dhe i zoti i banesës kishte kultivuar kanabis në vazo lulesh, u organizua dhe u finalizua operacioni policor i koduar “Poligoni”.
Në kuadër të këtij operacioni u bë kapja dhe arrestimi i: V.R., 48 vjeç, V.R., 17 vjeç (babë dhe bir), banues në Kurbin dhe A.L., 17 vjeç, banues në Fushë Krujë (shok i 17-vjecarit V.R).
Gjatë kontrollit të ushtruar nga shërbimet e Policisë, në oborrin e banesës së shtetasit V.R., në Laç, u gjetën të kultivuar në vazo lulesh, disa fidanë të dyshuar narkotikë kanabis sativa.
Gjithashtu, gjatë operacionit, Policia ka gjetur dhe sekuestruar brenda banesës së shtetasit të lartpërmendur, një armë zjarri automatik, një armë zjarri pistoletë dhe municion luftarak.
Materialet hetimore u referuan në Prokurorinë e Rrethit Gjyqësor Kurbin, për veprime të mëtejshme, për veprat penale “Armëmbajtja pa leje” dhe “Kultivimi i bimëve narkotike”, kryer në bashkëpunim, shtuan të njëjtat burime.
