Arben Imami, ish-ministër i Mbrojtjes në Qeverinë e PD dhe ish-deputet i kësaj partie, u shpreh sot se mes Edi Ramës dhe Lulzim Bashës ka negociata.
“Pyetjes suaj unë po i përgjigjem qartë, përpjekja për negociata ka nisur që në 17 Maj, ka dy dështime të mëdhaja, që janë zgjedhjet e 2017 dhe 2021, vazhdimi i kësaj rruge dihet se ku na çon, në zgjedhjet e 2025 dhe më tej”, tha Imami, kur u pyet nëse ka informacione për negociata mes Ramës dhe Bashës.
Bujar Nishani, ish-President, Arben Imami, Edvin Kulluri, Edit Harxhi, Bislim Ahmetaj, etj, u shfaqën sot në një konferencë për mediat duke përsëritur kërkesën për dorëheqjen e Lulzim Bashës nga posti i Kreut të PD pas humbjes së zgjedhjeve.
“Njeriu i thjeshtë nuk është i përfaqësuar sot. Komuniteti nuk ka më vlerë, deputeti del nga listat e kryetarit dhe nuk përfaqëson elektoratin. Zëri i qëytetarëve nuk ka dinjitëtin që meriton, ata, shtypen, blihen dhe nuk dëgjohen.
Rreziku më i madh që na kanoset është pranimi i qytetarëve me këtë situatë. Partia Demokratike është e vetmja forcë politike që ka dhënë kontribute për demokracinë dhe lirinë në vend. Ne mendojmë se është e vetmja forcë që mund të sjell shpresën në Shqipëri. PD duhet të korigjojë gabimet e veta dhe të rikthehet në bazat e një demokracie të brendshme dhe të fotrtë.
Nuk mund të ketë një qeverisje të mirë në vend kur keqqeveriset në parti, nuk mund të ketë luftë ndaj korrupsionit nëse korrupsioni gëlon në parti.
Ne propozojmë reformimin e PD-së, si dhe bashkimin e të gjithë të djathtëve të larguar. Ne duhet të kthejmë vlerat e të djathtës konservatore në Partinë Demokratike.
Vetëm kjo PD mund të fitojë dhe ne bëjmë thirrje për reflektim dhe të mblidhemi rreth principeve dhe jo rreth individëve. Ftojmë të mblidhemi rreth modeli më të mirë të Partisë Demokratike ndër vite”, thuhet në deklaratën zyrtare të grupimit “Për PD”.
