Skuadra e Maliqit është shumë pranë ëndrrës historike të ngjitjes në Kategorinë e Parë. Juglindorët arritën të triumfonin në transfertë ndaj Labërisë në “finalen” e Grupit B, teksa kur kanë mbetur edhe 4 javë nga fundi, skuadra e drejtuar nga trajneri Egli Malësija, udhëheq kampionatin me 1 pikë më shumë se Butrinti, i cili duhet theksuar se ka zhvilluar një ndeshje më shumë se maliqarët.
Pas triumfit 0-1 ndaj Labërisë, në dhomat e zhveshjes së bardhekuqve, ka shpërthyer festa, ku protagonist ishte autori i golit Dario Kame.
Gjasat janë të mëdha, që në fund të sezonit, Maliqi ta shoh veten për herë të parë në histori në Kategorinë e Parë. Kujtojmë që skuadra juglindore i shkoi shumë pranë kësaj ëndrre edhe sezonin e kaluar, teksa u përmbys në sekondat e fundit nga Veleçiku në finalen e “play-out”-it të zhvilluar në stadiumin “Nexhip Trungu” të qytetit të Cërrikut.
Në 4 javët e mbetura, Maliqi do të presë në shtëpi Albëptrolin dhe Këlcyrën, ndërkohë që do të luajë në transfertë me Memaliajn dhe Përmetin.
