Pas thirrjeve për dorëheqje ndaj Lulzim Bashës nga disa anëtarë të Këshillit Kombëtar të PD, strukturat në Tiranë dhe rrethe kanë ndalë në krah të tij duke kërkuar që kryetari të mbështetet në një moment delikat siç është identifikimi i ndryshimit të vullnetit të qytetarëve përmes vjedhjes së votës.
Kreu i PD-së së Durrësit Ferdinand Xhaferaj tha se Basha duhej mbështetur teksa faktonte krimin elektoral që bëri Rilindja, ndërsa sëfundmi kanë reaguar edhe degët e tjera të PD-së, siç është ajo e Beratit, Krujës, Shijakut apo njësive administrative të Tiranës.
“Partia Demokratike u paraqit në zgjedhjet e 25 Prillit me një program e platformë të qartë në ndihmë të qytetarëve në ndryshim nga partia në pushtet e cila e kaloi të gjithë fushatën me tallje e fyerje për qytetarët. Populli votoi masivisht për ndryshim por ndikimi i grupeve kriminale dhe shitblerja e votës e dëmtuan procesin zgjedhor”, shkruajnë demokratët e Krujës.
Ndërkohë, demokratat beratas shprehen se ata bashkë me kryetarin e Partisë Demokratike Lulzim Basha ishin dhe janë sërish e vetmja shpresë për shpëtimin e Shqipërisë dhe shqiptarëve nga ky regjim kriminal.
“Ne jemi Partia Demokratike e Shqiperise, partia e vlerave dhe moralit, ne luftojmë për largimin e këtij regjimi të kalbur e jo njëri-tjetrin.
Ne kemi një lider, ai është Lulzim Basha, i cili ka patur dhe do ketë mbështetjen pakursyer dhe të vazhdueshme nga demokratet dhe qytetaret e Njesise 6, ai eshte i vetmi lider që mund ti prijë ndryshimit”, deklarojnë ndërkohë demokratat e Kombinatit në Tiranë.
