Jurgen Klopp tha se mundësia për t’u rikthyer në Dortmund si kundërshtar me ekipin e tij të ri Liverpool është një histori që vetëm futbolli mund të shkruajë. Goglat e shortit vunë Liverpool përballë Dortmund në çerekfinalet e Ligës së Europës, në atë që konsiderohet si finalja e parakohshme duke qenë se të dyja skuadrat janë favorite për fitimin e trofeut. Trajneri nga Gjermania, i cili ka drejtuar Dortmund për shtatë sezone, nga viti 2008 deri në vitin 2015, deklaroi se është i magjepsur nga ky short. Jurgen Klopp, gjatë stërvitjes së djeshme të Liverpool Pasi eliminoi Manchester United, me rezultatin e përgjithshëm 3-1, Klopp deklaroi: “Jam shumë i lumtur me shortin. Që para shortit kisha dëshira të përballesha me kundërshtarin më të fortë të mundshëm sepse nëse synon të fitosh Europa League, kur je në çerekfinale, duhet të jesh gati për skuadrën më të fortë. Jam i lumtur që do i prezantoj Dortmundit skuadrën time të re dhe gjithashtu t’i tregoj djemve që drejtoj tani për atë stadium të mrekullueshëm dhe për një qytet fantastik. Kjo është një histori që vetëm futbolli mund ta shkruajë.” Jurgen Klopp ka qenë për shtatë vite trajner i Borussia Dortmund 48-vjeçari zbulon se ka ende tre abonime sezonale në “Westfalenstadion”, si pasojë e lidhjes së tij me Borussia. “Kam ende tre abone për të gjithë sezonin, por ia kam lënë djalit tim dhe shokëve të tij që shkojnë shpesh në stadium, kur ai nuk është me mua në Liverpool. Tani po pres me padurim të shkoj në një vend që e kam dashur aq shumë dhe ky kam kaluar momentet më të bukura të jetës time, por për të qenë realist, që pas ndeshjes ndaj Manchester United në mendjen time është vetëm sfida ndaj Southampton,” – përfundoi Klopp, duke iu referuar ndeshjes së ardhshme në Premier League.
Burimi: http://telesport.al/klopp-kundershtar-ne-dortmund-histori-qe-vetem-futbolli-mund-ta-shkruaje/
© telesport.al
