Një nga kryesfidat e javës së 30-të të Superiores, që do të luhet nesër, është Laçi-Partizani. Për shumë arsye. Qoftë nga pozicioni që kanë në klasifikim, me synim madhor titullin, qoftë nga polemikat që i kanë paraprirë këtij ballafaqimi, pa harruar edhe ndjenjat e hakmarrjes së të kuqve për eliminimin në çerekfinale të Kupës së Shqipërisë. Në konferencën për shtyp, trajneri Ilir Daja u pyet për të gjitha këto:
Na gëzon fakti që kanë shënuar tre sulmuesit në ndeshjet e fundit. Jemi ekipi me më shumë gola të realizuar, por kjo ka pasur një shpërndarje në lojtarë të ndryshëm. Na vjen mirë që ka funksionuar edhe Stenio Junior, pavarësisht se nuk ka luajtur në pozicionin e tij natyral. Po i afrohemi fundit dhe nuk duhet të ndryshojmë shumë. Ekipi fitues duhet të jetë edhe në vazhdimësi.
Çfarë na tremb? Ka disa gjëra, por në nivel paragjykimi unë nuk mund t’i shpreh. Nuk dua të futem në atë nivel. Ajo që duhet të na trembë dhe të na japë forcë është potenciali që ka grupi. Futbollistët duhet të bëjnë të njëjtën gjë edhe në këto javë, në mënyrë që të shkojmë drejt objektivave.
Kemi bërë edhe lojëra të mira, çka të jep garanci për të ardhmen. Janë edhe shtatë javë dhe ndonjëherë mund të tregohemi cinikë, pasi ka shumë vlerë marrja e pikëve. Nuk lejohen hapa fals. Duhet një miksim mes lojërave të mira dhe cinizmit.
Akuzat e Laçit? Nuk kam pse të fokusohem te deklaratat. I kam kërkuar ekipit të përqendrohet vetëm te puna jonë dhe jo tek ato që thuhen për ne. Pas ndeshjes me Kukësin kam dëgjuar edhe unë, pasi e thashë nuk jam i interesuar çfarë mendojnë të tjerët. Gjithsesi, pema me kokrra gjuhet me gurë. Besoj që ne duhet të anashkalojmë çdo deklaratë, por meqë kanë dalë pas ndeshjes me Kukësin, duhet të kujtojmë që të gjitha i kemi fituar me të. E kemi bërë edhe me gola. Nuk duhet të shpërqendrohemi, por ta kemi mendjen te ndeshja e radhës.
