Eraldo Çinari vazhdon të shënojë për Partizanin. Duket se gjithmonë kur luan, shkodrani tund rrjetën, duke qenë një ndër lojtarët më produktivë në Superiore. Sulmuesi i “demave” është pa diskutim një ndër lojtarët më të mirë në kampionatin shqiptar dhe një rrezik konstant për të gjithë mbrojtësit kundërshtarë.
Bomberi shkodran është aktivizuar në të tria pozicionet e sulmit nën urdhrat e trajnerit Daja dhe ka qenë tepër produktiv, duke shënuar 6 gola në vetëm 15 ndeshje.
Për “Panorama Sport”, Çinari foli për fitoren e marrë kundër Kukësit, duelin personal që ka me Asanin për golashënuesin më të mirë, si dhe për të ardhmen e tij, duke u shprehur: “Më mirë t’ia lëmë kohës”.
Paraqitja ndaj Kukësit- E filluam pak keq takimin, por që gjithsesi, e morëm veten me kalimin e minutave. Goli i parë na hapi shumë rrugë dhe më pas shënuam edhe tre të tjerë. I shfrytëzuam rastet tona në maksimum dhe bëmë një ndeshje shumë të mirë.
Partizani, makthi i verilindorëve këtë sezon? Është e vërtetë, kemi marrë katër fitore. Kemi punuar me trajnerin Daja gjatë gjithë javës për të gjetur pikat e dobëta të Kukësit dhe, falë Zotit, arritëm t’i shfrytëzonim dhe të merrnim këtë fitore kaq të rëndësishme kundër një kundërshtari që, edhe pse nuk ka bërë një ecuri siç duhet, prapë merret në konsideratë.
Me skemën 4-3-3 të Dajës, keni luajtur si qendërsulmues dhe nga krahët. Ku ndihet Eraldi më mirë?
E rëndësishme është të vazhdojmë rrugën kështu siç jemi dhe të marrim pikët. Pak rëndësi ka ku luan Çinari. Duam maksimumin në çdo ndeshje dhe të arrijmë objektivat që kemi ne si klub.
Shënon Asani, shënon Çinari. Duket se ka edhe një “duel” personal mes jush…
(Qesh) Nuk e shohim si duel personal, rëndësi ka që golat tanë t’i shërbejnë ekipit për të arritur objektivin që ka, që është titulli kampion.
Partizani dhe Vllaznia janë në krye të tabelës. Sa i lumtur është Çinari që sheh ekipin e tij, por edhe ekipin e qytetit të lindjes, të bëjnë kaq mirë këtë sezon?
Të them të drejtën, më bëhet shumë qejfi për Vllazninë, sepse ka pasur shumë kohë që nuk ka qenë në gjendje të mirë. Politikat kanë qenë ashtu. Por, me ardhjen e Xhaferit, është një stimul, po e mbështet shumë mirë skuadrën. Më bëhet qejfi shumë dhe shpresoj që të vazhdojë me këto ritme. Normalisht, dua që Vllaznia të bëjë mirë, pasi është ekipi ku jam rritur, por shpresoj që të fitoj titullin kampion me Partizanin.
Do të jetë Çinari lojtar i Partizanit sezonin e ardhshëm?
Mendoj se këtë gjë duhet t’ia lëmë kohës…
