Olsi Uku u shfaq shumë i lumtur për fitoren që skuadra e tij arriti ndaj Burrelit, por trajneri dinamovit kërkon përqendrim nga të tijtë, duke i cilësuar tri takimet e radhës si finale.
“Fitorja, kur kjo arrihet në limitet e lojës, të shijon edhe më shumë. Falënderoj çunat për qetësinë, maturinë e sigurinë që nxorën në fund këtë fitore kundër një kundërshtari që normalisht është nga më të fortët e grupit. Besuan deri në fund dhe ia arritën qëllimit”, shprehet Uku, i cili më tej shton:
“Edhe pse fituam ndaj Burrelit, lufta për t’u ngjitur në Superiore ende nuk ka mbaruar. Kjo, përderisa nuk është fituar matematikisht. Futbolli ka edhe të papritura që kurrsesi nuk duhet të na ndodhin. Asgjë s’ka mbaruar, kemi ende edhe tri finale. Javën e ardhshme është finalja e radhës kundër Korabit.
Vetëm kur ta mbyllë matematika, mund të them se Dinamo është ngjitur në Superiore. Situata mund të ndërlikohej nëse do të barazonim, ndaj është një fitore me shumë vlera për ne. Ndeshja e radhës është shumë e rëndësishme dhe na duhet një punë e madhe për ta fituar”, deklaroi Uku.
