Në axhendë, Shqipëria ka dy ndeshje miqësore në muajin qershor. Në dukje, të parëndësishme, teksa pas verës do të rinisë edicioni i kualifikueseve të Botërorit dhe forma e lojtarëve është e rëndësishme për t’u parë se si do të jetë në përfundim të fazës përgatitore në klubet respektive. Mirëpo, koha shtrëngon për FSHF-në, pikërisht në lidhje me Kombëtaren, për dy çështje: Bajrami dhe Kasami janë ato që presin zgjidhje, për vetë karrierën e dy futbollistëve, por edhe për strategjinë e përfaqësues në vijim.
Shqipëria bindi talentin e Kombëtares U-21 të Zvicrës, Nedim Bajramin, që të vishet kuqezi, duke harruar kleçkat në rregulloren e ndryshuar rishtazi nga FIFA. Kësisoj, djaloshi nuk mori dot miratimin nga FIFA dhe tani karriera e tij ndërkombëtare është në udhëkryq. Për këtë, nxitimi në FSHF duhet të jetë i madh, për të bërë të mundur përpilimin në kohë rekord të një dosjeje të saktë dhe me argumente fituese në gjyqin sportiv në KAS.
Djaloshi pret përgjigje, aq më tepër kur edhe karriera e tij me klubet është drejt një hapi të rëndësishëm. Për të sirenat nga Seria A janë gjithnjë e më shumë konkrete. “Jam i fokusuar ta përfundoj si duhet këtë sezon me Empolin, më pas do të shohim hap pas hapi çfarë do të bëjmë”, është përgjigjur Bajrami në mediat italiane, kur çdo ditë e më shumë rritet interesimi i Sampdorias për shërbimet e tij. Prej javësh, në FSHF po kërkohet që të shtohet me të gjitha elementet e duhura kërkesa në gjyqin që do të hapet në KAS ndaj FIFAs, në mënyrë që të fitohet kjo çështje dhe të çohet deri në fund dëshira e vetë lojtarit për të luajtur me Shqipërinë.
Djegur një herë me Bajramin, në FSHF nuk do të nxitojnë me rastin Kasami. Ndonëse nevoja për një fantazist, që të mund të rrisë edhe efikasitetin e sulmuesve në ekip është e madhe, pritet që institucioni i futbollit në vend të mund të ketë garancinë juridike maksimale, përpara se të bëjë kërkesën që Kasami të lërë Zvicrën (nuk ftohet prej pesë vitesh) dhe të kërkojë nga FIFA që të vishet kuqezi. Kështu që, çështja “Bajrami”, në njëfarë mënyre mban pezull edhe rastin e Pajtim Kasamit, i cili së fundmi po shkëlqen në Zvicër me Bazelin, duke shënuar radhazi./Panoramasport
