Ish-Ministri i Jashtëm, Besnik Mustafaj, i cilësoi thirrjet e kryedemokratit Lulzim Basha sot si sjelljet e një kryeministri të ardhshëm.
Mustafaj gjithashtu tha se kishte hasur problem gjatë votimit pasi aparati kishte vështirësi në njohjen e gjurmëve të gishtave.
“Nëse ka pasur tentativa për manipulim apo për të implikuar krimin e organizuar në mbështetje të PS për të manipuluar rezultatin, atëherë ka rrezik që po këta njerëz të përpiqen të ndërhyjnë në numërim, por gjithashtu besoj që do ta kenë të vështirë”,– tha Mustafaj.
I pyetur nga gazetarët se si i duket veprimi i Albin Kurti, i cili zgjodhi të votonte në Shqipëri, Mustafaj thotë Kurti thjesht ka shprehur solidaritetin e tij për kandidatët.
“Unë besoj se i është dhënë një rëndësi që nuk e ka. Duke qenë se është votues në Shqipëri atëherë ai duhet të vinte të bënte detyrën e tij si qytetar. Nuk është një përzierje. Ka pasur të tjerë nga fqinjët tanë që kanë ndërhyrë edhe në punët e brendshme në Shqipëri, ndërsa Albin Kurti ka dhënë edhe solidaritetin e tij për kandidatët“,- shprehet ai.
Sipas tij vëmendja dhe përqendrimi tek dita e votimit është shumë e madhe edhe nga ana e ambasadorëve.
“Ka disa momente kur roli i ambasadorëve mund të kishte qenë shumë më efikas”,- tha Mustafaj.
