Kreu i KQZ-së, Ilirjan Celibashi konfirmoi se aplikacioni përmes së cilit qendrat e votimit raportojnë pjesëmarrjen në votime në KQZ është sulmuar. Për këtë arsye, shtoi ai, ka dhe një raportim të ulët nga qendrat e votimit për pjesëmarrjen – deri në orën 13:00 ka të dhëna nga 69 qendra, nga 5199 që janë në total.
“65 qendra është numri i atyre që kanë raportuar, është një sistem raportimi mbi pjesëmarrjen që KQZ e deklaron mbi bazën e qendrave që raportojnë informacion. Kemi një numër të vogël qendrash që kanë raportuar pasi aplikacioni i KQZ është sulmuar pak më përpara dhe nuk mund të mos ndodhte. Teknikët tanë po e tentojnë ta zgjidhin, por kemi dhe një plan B dhe një plan C për të përditësuar pjesëmarrjen”, u shpreh Celibashi në një deklaratë për mediat.
Celibashi informoi se në 144 qendra votimi, identifikimi i votuesve po kryhet në mënyrë manuale. “Prej tyre, informacioni është që në 83 prej tyre është aplikuar për shkak se s’janë paraqitur operatorët, pjesa tjetër kanë pasur probleme me pajisjen, në disa raste komisioni i qendrës s’ka pritur për të marrë këshillimet e duhura teknike nga KQZ apo të prisnin për zëvendësimin e pajisjes dhe në këtë mënyrë kanë proceduar manualisht”, shtoi.
“Në raste sporadike ka pasur pezullim të përkohshëm të votimit për çështje të identifikimit, por edhe problematike të tjera si konflikte mes anëtarëve të qendrës së votimit, por shumica ka qenë të karakterit të administrimit të procesit, pa cenuar zgjedhjet”, vijoi Celibashi.
Ai shpjegoi se në shkollën “Petrit Muço” ku janë 12 qendra votimi ka pasur grumbullim njerëzish. “Në ambientet e jashtme dhe në ambientet e brendshme që është e palejueshme, se brenda ambienteve dhe përreth vetëm votuesit që duhet të jenë në radhë lejohen. Situata është qartësuar, procesi është duke u zhvilluar normalisht”, tha ai.
