Sulmuesi i Partizanit, Erland Çinari është shprehur se rivali më i fortë për të kuqtë në kampionat është Vllaznia. Për “Zona Gol”, futbollisti i Partizanit është shprehur se tashmë të kuqtë kanë 7 finale dhe nuk iu lejohen gabimet.
“Nëse deri tani kemi dështuar me disa ekipe që duken të lehta në letër, tani jemi në një pikë, ku nuk na lejohen gabime të tilla. Tani luftojmë për titullin. Nuk na lejohen gabime si ato me Skënderbeun, Apoloninë apo edhe në ndeshjet e tjera. Tani kemi 7 ndeshje dhe janë 7 finale.
E ardhmja? Të them që nuk ka oferta, nuk mund ta them. Ekipi po ecën mirë, po ashtu edhe unë po bëj mirë. Oferta ka. Nuk e kam parë të vështirë, për t’u ulur dhe të flasim. Do ulem me drejtorin dhe presidentin dhe do flasim, janë njerëz shumë korrektë. Si çdo futbollist, dëshira është që ta provoj veten jashtë.
Rivaliteti është diçka e mirë, pasi e ndihmon një skuadër të rritet. Sulmi po shënon dhe shpresoj të vazhdojmë kështu deri në fund.
“Air Albania”? Terreni është shumë i mirë, na ndihmon që ta luajmë topin. Jemi një ekip që e luajmë shumë topin dhe na ndihmon shumë të luajmë aty.
Nëse Daja më beson penalltinë në minutën e fundit ndaj Vllaznisë? Unë do shkoj ta gjuaj. Jam profesionist dhe jap maksimumin për Partizanin. Shpresoj që të mërkurën të marrim maksimumin me Laçin.
Rivali më i fortë? Të them të drejtën, për momentin është Vllaznia ekipi që nuk e kemi mundur ende. Për momentin shikoj Vllazninë si rivalin më të fortë.
Nesër kemi stërvitje dhe nuk mund të votoj. Trajneri Daja nuk na lejon të shkojmë të votojmë.” (Qesh)
