Kukësi praktikisht është jashtë gare për një vend në kupat e Europës për sezonin e ardhshëm. Verilindorët, pas barazimit me Tiranën, u mposhtën nga Partizani dhe këtë kampionat u ndodh për të katërtën herë.
Trajneri Mirel Josa, pas ndeshjes me të kuqtë, në emisionin “Gol pas Goli” në Supersport deklaroi:
“Vërejtjet janë normale, oshilacionet kanë qenë. Sot luajtëm pa presion deri në pësimin e golit të parë, që erdhi nga goditja standarde. Po zhvillonim lojën tonë, kishim qarkullim topi, por Partizani na kapi të çekuilibruar në disa momente. Te goli i dytë gabuam te markimet, lojtarët qëndruan larg, por nuk dua të përmend emra.
Partizani e meritoi fitoren, mund të na kapte në hapësirat boshe në pjesën e dytë. Sedra jonë u vu në dukje që është minimale. Roli i Kukësit në këtë kampionat është të paraqitet sa më mirë në aspektin individualist, për t’i bërë llogaritë më vonë.
Problemi është që ka pasur ndeshje ku lojtarët kanë treguar sedër, por në ndeshje të tjera kemi pasur oshilacione. Sot, përveç sedrës, edhe lufta sportive, sidomos pas pësimit të golit të parë, na ra komplet. Nuk mund të flas për mungesa, skuadra duhet të luftojë e gjitha së bashku.
Nuk ka mundësi të filtrojë Çinari në atë mënyrë te goli i dytë. Erdhi problemi te goli i tretë, ia dhuruam golin Partizanit. Nuk donim t’ia dhuronim, por ky është realiteti“, deklaroi trajneri i skuadrës verilindore.
