Kryeministri Edi Rama ka shmangur komentet lidhur me bllokimin e një automjeti me rreth 7 mln lekë, që dyshohet se do përdoreshin për blerje votash.
Personat e ndaluar janë Denis Xholi, punonjës i administratës së Bashkisë Bulqizë e drejtuar nga Lefter Alla i Partisë Socialiste, dhe Albjon Xholi kushëriri i tij.
Automjeti u bllokua nga strukturat e PD për mbrojtjen e votave. Kryeministri Edi Rama ndërsa u përball me pamjet në emisionin “Opinion” tha se pamje të tilla janë edhe një arsye më shumë sepse shqiptarët duhet të votojnë më 25 prill Partinë Socialiste.
“Ajo që dihet deri më tani është fakt se në Shqipëri është ngritur një strukturë paramilitare me figura shumë të errëta të cilët kanë shërbyer në polici, por edhe me ish-prokurorë të korruptuar.
Skenat që shfaqen kur këto grupe dalin dhe bllokojnë rrugët dhe kapin makina. Këto janë falanga që krijojnë situata sikur ne jemi fiset hutu.
Këto struktura paramilitare vranë një qytetar në Elbasan”, tha Rama.
Kryeministri iu shmang pamjeve lidhur me Dibrën duke bërë lojra fjalësh, ndërsa theksoi se tashmë policia dhe prokuroria po hetojnë lidhur me këto pamjet dhe do të jetë hetimi që do të përcaktojë nëse paratë do të përdoreshin për blerje votash.
“Fajësinë apo pafajësinë e tyre nuk e caktojnë këto grupet paramilitare të PD-së”, tha Rama.
Kryeministri ka humbur qetësinë përballë pyetjeve, ndërsa u shpreh “Zoti qoftë me ju, kur relativizoni të pakrahasueshmen”.
“Në Elbasan kemi një kufome që ka bërë një familje të humbasë njeriun e vet, që tronditi qytetin, dhe krimi u krye nga dora e dikujt që është pjesë e strukturave të mbrojtjes së votës, që për mua janë struktura të armatosura”, tha Rama.
