Ky është shefi i Seksionit për Hetimet e aksidenteve në policinë e Vlorës i cili është arrestuar, pasi akuzohet se i ka bërë presion të plagosurit në aksidentin tragjik të 26 nëntorit, ku mbeti i pajetë edhe një 18-vjeçar.
Myslim Ismailaj në cilësinë e Oficerit të Policisë Gjyqësore i ka kërkuar të plagosurit Petraq Beja që të deklarojë se ka probleme me shikimin, duke dashur të nxjerrë shikimin si shkak të aksidentit dhe jo faktin që në rrugën në ndërtim mungonin tabelat për të sinjalizuar se rruga kishte devijim dhe në mes të saj ishte hapur një gropë.
Ismailaj ka hyrë në ambientet e dhomës së spitalit ku ndodhej i shtruar i plagosuri Petraq Beja dhe pasi ka nxjerrë familjarët nga dhoma, i ka kërkuar këtij të fundit të deklarojë se ka probleme me shikimin.
Kjo për të devijuar hetimin, se shkak i aksidentit ka qenë shikimi i dobët i drejtuesit të mjetit dhe jo mungesa e sinjalistikës rrugore në vendin e aksidentit, duke ushtruar presion ndaj të riut dhe tentuar të favorizojë firmën e ndërtimit të rrugës.
