Kreu demokrat Lulzim Basha u shpreh mëngjesin e sotëm gjatë një takimi në Sarandë se nga veriu në jug, nga lindja në perëndim, ndjen ndryshimin.
“Ndryshimi do të vijë duke votuar Aleancën për Ndryshim, nr 9”, iu drejtuar Basha qytetarëve, që e pritën me ovacione dhe thirrjet “Rama ik”.
Basha tha se Edi Rama la në vendnumëro Shqipërinë, la në vendnumëro Sarandën.
“Tetë vite me rradhë nuk ka bërë asgjë dhe tani dështimi po troket në derën e shqiptarëve. Por kudo që shkoj dëgjoj se me 25 prill nuk do ia hapim derën dështimit, më 25 prill do të zgjedhim ndryshimin”, tha Basha. Ai tha se ndryshimi është rruga e shpresës dhe ripërtëritjes, ndryshimi do të ndalë largimin e të rinjve dhe do t´i sigurojë punësim, arsimin dhe garanton rrugën europiane të Shqipërisë.
Ndërsa u shpreh optimist për ndryshimin në 25 prill, Basha i drejtoi një apel qytetarëve që të bashkohen.
“Bashkimi do të sjellë ndryshimin, ndaj ju bëj thirrje që më 25 prill të bashkohemi të gjithë, demokratë dhe socialistë, për të garantuar ndryshimin”, tha Basha.
Ai tha se Qeveria e drejtuar prej tij do t´i shërbejë çdo shqiptari, sepse ndryshimi do të jetë i prekshëm për çdo shqiptar.
“Edhe Edi Rama e ndjen se ndryshimi po vjen, edhe ai po e ndjen forcën e shqiptarëve, e cila është e papërballueshme. Edhe ai e di që më 25 prill Shqipëria do të fitojë. Tani kërkon që të bëhet pjesë e fitores, por përgjigjia jonë është: JO.
Nuk ka kohë më për Edi Ramën, më 25 prill e largojmë me votë. Koha jote ka mbaruar. Edhe socialistët e kanë kuptuar se me Edi Ramën nuk ka ndryshim”, tha Basha.
