Ylli i NBA-së, LaMarcus Aldridge, një nga ikonat e këtij sporti, ka vendosur të mos zbresë më në parket, për shkak të një problemi në zemër. Ndeshja e së shtunës së kaluar me fanellën e Brooklyn Nets, ajo ndaj Lakers, është e fundit e karrierës së basketbollistit 35-vjeçar. Ndeshja nr.1029 në karrierë në NBA.
“Luajta, por pas ndeshjes kisha rrahje të forta të zemrës. Situata u përkeqësua edhe më shumë dhe u shqetësova. Tani jam më mirë, por ajo që përjetova atë natë ka qenë një nga përvojat më të këqija të jetës time”, tha Aldridge përmes një letre për mediat e fansat. Ai pat firmosur në mars me Brooklyn pas 5 vitesh me San Antonio.
“Për 15 vjet kam vënë basketbollin në plan të parë. Ka ardhur momenti që tashmë të mendoj për shëndetin dhe familjen time. Për këtë arsye, vendosa të mbyll menjëherë karrierën time”, tha LaMarcus Aldridge, 7 herë pjesëmarrës në “All Star Game”.
Aldridge ka luajtur për 15 sezone në NBA. Ai e nisi karrierën me Portland në vitin 2006, ku luajti për 9 sezone dhe më pas u transferua te San Antonio e një muaj më parë te Brooklyn. Me fanellën e Nets u aktivizua vetëm 5 ndeshje, pasi problemi në zemër i dha fund më herët karrierës së tij.
