Presidenti Ilir Meta u shpreh sot se cilido që do të guxojë të prekë votat në zgjedhjet e 25 prillit, do e ketë vendin në burg.
Meta denoncoi raste që persona me precedentë kriminalë janë pajisur me karta ID, ndërsa tha se ka njoftuar institucionet e vendit për të hetuar rastet.
“Dua ti them këtyre personave të përfshirë në skemën e tjetërsimit të votave që të mos guxojnë të paraqiten në qendrat e votimit me karta ID false, të personave të tjerë apo të parregullta. Do të përfundoni në burg”, tha Meta.
Ai gjithashtu paralajmëroi nëpunësit e institucioneve që të mos guxojnë të pajisin me dokumente të parregullta individët, pasi sërisht do të përballen me ligjin.
Presidenti gjithashtu paralajmëroi se Edi Ramës i është përvëluar skenari që do të merrte pa zgjedhje fare 9 mandate.
“Nuk ka çuna problematikë Vlora, pasi gratë dhe vajzat e Vlorës dinë tua tregojnë vendin. I them edhe Damianit që atë tërmetin nuk e bën dot në Vlorë. Skenari iu dogj, mos provokoni Vlorën dhe Vlora ndizet dhe ju e dini se çfarë ndodh. Do të jem nesër në Vlorë, do të jem edhe në datën 25, edhe kur të numërohen votat. Ndaj u them komisionerëve, djemve problematikë të Astir mund tua keni marrë lekët po kini kujdes”, tha Meta.
