Kreu demokrat Lulzim Basha, tha mbrëmjen e sotme, se gjatë qeverisjes së tij, nuk do të ketë arsimtarë me paga nën 700 euro.
“Rritja do të fillojë nga viti i parë me 15% çdo vit për arsimtarët e sistemit parauniversitar”, tha Basha.
Kreu demokrat u shpreh se duke nisur nga 1 shtatori përmes bashkëpunimit me Aleancën e Universiteteve Europiane qeveria ime do të ofrojë 5 gjuhë të huaja, pa pagesë për shqiptarët nën moshën 35 vjeç, anglisht, gjermanisht, italisht, frëngjisht dhe spanjisht dhe 20 trajnime profesionale online.
Përsa i takon largimit masiv të shqiptarëve, Basha u shpreh se për çdo të ri serb që largohet, largohen 12 të rinj shqiptarë sepse atje vetëm në fushën e teknologjisë së informacionit janë hapur 40 mijë vende pune.
Për investimet e huaja, Basha tha se është shumë e rëndësishme trajnojmë rininë shqiptare dhe për vendin është shumë e rëndësishme të sjellim investime të huaja në një ambient më një rini të mirëtrajnuar duke ndalur kështu plagën më të madhe: largimin e rinisë nga vendi.
Për reformën shëndetësore, Basha u shpreh se do të ketë në qendër parimin paraja ndjek pacientin dhe jo paraja ndjek oligarkun.
“Paraja ndjek pacientin do të thotë që afër 900 milion euro që harxhojnë sot shqiptarët në sistemin shëndetësor italian, grek, apo turk, mjaftojnë për të krijuar në Shqipëri institucione të shërbimit shëndetësor që mund të garantojnë si fillim të njëjtën cilësi të shëndetit publik që garantojnë vendet e rajonit”, tha kreu demokrat.
Ai tha se 25 prilli do jetë një ditë shumë e veçantë në historinë e vendit, do jetë dita kur shqiptarët do të zhveshin barrën, ankthin, makthin e këtyre tetë viteve.
“Unë besoj se masivisht shqiptarët këtë përgjigje e kanë në mendjet e tyre, në zemra e tyre dhe me 25 prill do ta konkretizojnë me votat e tyre”, tha kreu demokrat.
