Erling Haaland i ka befasuar të gjithë me golat e shumë të shënuar, edhe pse është vetëm 20 vjeç. Norvegjezi po shkëlqen me Dortmund në kampionatin gjerman, aty ku luan një tjetër goleador i frikshëm si Robert Lewandowski.
Bomberi polak i Bayern Munchen dhe futbollisti më i miri në planet për vitin 2020, thur elozhe për talentin viking, beson se Haaland do të bëhet sulmuesi më i mirë në botë, por duhet të presë edhe pak.
“Haaland është një futbollist i shkëlqyer. Ai është ende shumë i ri dhe ka një potencial të madh. Nëse e sheh në fytyrë, e dallon lehtë urinë e madhe që ka dhe dëshirën për të shënuan gola. E ka mundësinë për t’u bërë sulmuesi më i mirë në botë. Por kujdes, jo gjithçka shkon mbarë gjithmonë dhe në futboll nuk ka asgjë të lehtë.
Erling po realizon shumë gola, por është akoma i ri. Unë mendoj se është diçka fantastike të kesh një talent të tillë në Bundesligë dhe të përballesh me të. E përsëris, ai është një futbollist që mund të bëhet më i miri.
Gjithsesi, unë nuk kam ndërmend t’i hap rrugë dhe t’ia jap stafetën. Jam i lumtur këtu ku jam dhe kam ndërmend të luaj në nivele të larta edhe për disa vite“, theksoi 32-vjeçari i kampionëve të Evropës.
