Pritjet së gjatë i ka ardhur fundi! Kanë nisur ditën e sotme, punimet për rikonstruksionin e impiantit sportiv në qytetin e Maliqit. Një investim ky i bashkisë përkatëse, që ishte planifikuar të niste sezonin e shkuar, por për shkak të kushteve të jashtëzakonshme të pandemisë, u shty në kohë.
“Panorama Sport”, mëson se në fazën e parë do të bëhet i mundur shtrimi i tapetit artificial. Ndërkohë që në fazën e dytë, do të realizohet ndërtimi i tribunës qëndrore, si dhe restaurimi i tribunave anësore ekzistuese.
Pritet që brenda muajit shtator, punimet të përfundojnë dhe stadiumi të jetë gati. Vlen të theksohet fakti, se skuadra e Maliqit, militon në Kategorinë e Dytë, teksa është pretendente së bashku me Butrintin për t’u ngjitur në Kategorinë e Parë. Këtë sezon, maliqarët i kanë zhvilluar ndeshjet në aneksin sportiv të stadiumit “Skënderbeut”, për shkak se terreni sportiv, nuk ishte i përshtatshëm, për zhvillimin e një ndeshje normale. Duke filluar nga sezoni i ri, Maliqi pritet të rikthehet në shtëpi!
