Futbollistët e klubit Ferizaj në Kosovë kanë vendosur të bojkotojnë ndeshjet e ardhshme në kampionat, si shenjë proteste ndaj mospagimit të rrogave të tyre.
Njoftimi është bërë nga vetë faqja zyrtare e klubit në “Facebook”, teksa shkruhet se futbollistët kanë shumë muaj pa marrë rrogat dhe nuk mund të vazhdojnë të luajnë më, duke mos pranuar të dalin në fushën e blertë për ndeshjet në vazhdim.
REAGIM!
Të nderuar Ujqi dhe bashkë-qytetarë, siç jeni në dijeni klubi ynë i zemrës FC Ferizaj, është në gjendje katastrofale – që nuk ishte asnjëherë tjetër. Eshtë afër shuarjes, që do të ishte humbje shumë e madhe për qytetin tonë.
Pas gjendjes shumë të rëndë, lojtarët kanë vendosur që ndeshjen kampionale, të dielën nuk do ta zhvillojnë – pasi që disa muaj nuk kanë marrë pagat e tyre që j’u takojnë.
Ku janë aksionerët e famshëm Anglez, që nuk i kemi parë kurrë në stadion! Ku janë aksionerët Ferizajas, që as nuk e kanë marrë mundin të interesohen për gjendjen e klubit. Ku është komuna, a po interesohet dikush apo i kanë ‘mbyllur’ sytë e veshët rreth kësaj çështje.
A nuk është mëkat që një qytet me ekonominë ndër më të mirën në Kosovë, të mos jetë në gjendje ta mbajë një klub futbolli stabil! Reagimet tona kanë shkuar çdo herë në ‘vesh’ të ‘shurdhur’ por këtë herë do të veprojmë.
Kryesia e Ujqve,
Ferizaj
