Ish-lideri komunist i Kubës, Fidel Kastro ka ndërruar jetë mbrëmjen e së premtes në orën 22:29 dhe se trupi i tij do të digjet në orët në vazhdim.
Lajmi është bërë i ditur nga vëllai i tij Raul Kastro, i cili drejton Kubën që prej vitit 2006.
Në një deklaratë të transmetuar në televizionin kombëtar, Raul Kastro njoftoi se ish-lideri ndërroi jetë.
Fidel Kastro, bashkë me vëllain e tij Raul, Che Guevaran dhe Camilo Cienfuegos ishin ndër protagonistët e revolucionit kuban.
Për shkak të shëndetit të tij të brishtë, Fidel Kastro ja la pushtetin vëllait të tij në vitin 2006. Mbështetësit e tij e kanë vlerësuar si një udhëheqës që i ka kthyer Kubën popullit, ndërsa kundërshtarët e akuzojnë se ka shtypur në mënyrë brutale opozitën. Duke nisur që sot, në ishull do të ketë disa ditë zie kombëtare. Në muajin prill, Fidel Castro mbajti një fjalim të rrallë në ditën e fundit të kongresit të Partisë Komuniste të vendit. Ai pranoi moshën e tij të thyer, por tha se konceptet komuniste kubanë ishin ende të vlefshme dhe populli kuban “do të jetë fitimtar”.
