Një relacion i gjatë që fliste për pasurimin e gjyqtarit të Apelit Administrativ në Tiranë, Bari Shyti, ka vënë në KPK me shpatulla pas murit magjistratin e dyshuar, si të përfshirë në afera korruptive.
Relacioni kishte gjetur një sërë problemesh në kriterin e pasurisë dhe evidentohej një raport negativ nga DSIK, e cila e cilësonte gjyqtarin Bari Shyti, të papërshtatshëm për të qëndruar në detyrë.
Bari Shyti u prit me protestë dhe u përball në seancën e “Vettingut”, me akuza për deklarime kontradiktore dhe mungesë burimesh prej 8.6 milionë lekësh të reja.
Në këtë shumë financiare, janë përfshirë si të pajustifikuara 21 mijë dollarë që Shyti, pretendonte se i kishte përfituar nga nxjerrja prej një stoku kromi të 60 tonëve mineral, të cilën ia kishte shitur kompanisë së vëllait “ERIM SH.P.K”.
Por trupi gjykues i KPK-së, i kujtoi Shytit se për shumën nuk provohej pagesa e tatimeve.
Madje nga Drejtoria e Tatimeve, ishte vënë në dukje se për të shitur dhe blerë mineral, Shyti duhej të kishte pasur aktivitet të regjistruar në gjykatë.
Gjithashtu trupa i kujtoi gjyqtarit Bari Shyti se ishte përfshirë në tregti kromi, në një kohë kur ai kishte statusin e magjistratit dhe vuri në dukje se përfshirja në biznes binte ndesh me Kushtetutën dhe faktin se gjyqtari nuk mund të kryente punë të tjera.
Si KPK dhe vetë gjyqtari Shyti, nuk u shprehën se çfarë pune konkrete ka bërë Bari Shyti, që ka arritur të nxjerë 60 ton krom në Bulqizë.
Ndër të tjera, ka dyshime të forta se gjyqtari Bari Shyti, është aksioner në ndërtimin e hidroçentralit “HEC Shytaj” në Bulqizë.
Kjo pasi kompania “ERIM SH.P.K” që zotërohet ngë vëllai i tij Islam Shyti, është bashkë-aksionere në këtë hidroçentral me kompanitë e tjera si “ARKEV SH.P.K” dhe “ÇUPI GROUP SH.P.K”.
Gjyqtari Shyti ka nisur karrierën në drejtësi qysh prej vitit 1993 dhe ka punuar si gjyqtar fillimisht në gjykatën e Bulqizës dhe atë të Dibrës.
Më pas në vitin 2013, Bari Shyti u dekretua si gjyqtar Administrativ në Durrës dhe prej vitit 2016 ushtron detyrën e tij të gjyqtarit në Gjykatën Administrative të Apelit. /Ora News
