25 javë kampionat, Partizani në vendin e 3-të, 2 pikë larg kreut, nëse do ja thoje një tifozi të Partizanit në periudhën shtator-tetor, do buzëqeshte, ndoshta do e merrte dhe për shaka, sepse të kuqtë ishin me duar të lidhura në merkato, disa lojtarë me shumë peshë ishin larguar si Trashi e Telushi dhe nuk mund t’i zëvendësonin, nga ajo periudhë duket sikur ka kaluar shumë kohë. Merkato u rihap, Çinari në thonjëza u lirua nga “burgu” dhe skuadra po funksiononte, megjithatë duket se diçka është bllokuar në ndeshjet e fundit, mekanizmi nuk ka qenë perfekt.
Vetëm 1 fitore edhe pse shumë e rëndësishme si ajo në derbi, në 6 ndeshjet e fundit duke përfshirë edhe Kupën, është pak për këtë skuadër. Në Kupë demat u eliminuan, por për të qenë më korrekt nuk shfaqen aspak pasiguri në lojë, madje meritonin më shumë dhe vendimet e gabuara të skuadrës së gjyqtarëve ndikuan në përfundimin e atij akti çerekfinal ndaj Laçit, por nëse eliminimi në Kupë është i justifikueshëm nga rrethanat se si ndodhi, çalimi në disa ndeshje të kampionatit duhet t’i shqetësojë deri diku drejtuesit teknik.
Barazim me Apoloninë, humbje me Skënderbeun dhe barazim pa gola me Teutën, ky i fundit është i pranueshëm, por në këtë moment të sezonit duhej me patjetër një fitore sidomos ndaj “djemve të detit”, ekip të cilin Partizani nuk e mposht prej 2 vitesh.
Një nga lojtarët që pritej të ishte një lider, Ferhan Hasani, ka luajtur vetëm 9 minuta, i prekur edhe nga dëmtimet, por befas emri i tij del në listën e përfaqësueses së Maqedonisë së Veriut në një kohë që ende duke përdorur një zhargon popullor ” nuk e ka bërë sefte” si duhet me skuadrën e tij të re. Gjithsesi pavarësisht ndonjë pengimi në javët e fundit dhe mungesës në vijimësi të fitoreve, demat janë vetëm 2 pikë nga vendi i parë dhe janë aq pranë sa t’a admirojnë e synojnë kurorën e kampionit. /Supersport
