Nga Boldnews.al
Boldnews.al raportoi rreth 10 ditë më parë mbi një tender që kompania Salillari u shpall si fituese nga Benet Beci, administrator i KESH, dhe kandidat i PS-së për deputet në Qarkun e Shkodrës.
Shuma e tenderit ishte 6.3 mld lekë ose rreth 5 mln euro, që Beci ia jepte kompanisë Salillari 5 javë para zgjedhjeve parlamentare të 25 prillit.
Dokumenti i publikuar nga Boldnews, në kokën e tij, nuk kishte një datë, por në fund të dokumentit thuhet “Njoftimi i klasifikimit të operatorëve është bërë me datë 1 Mars 2021”.
Por sipas Legjislacionit të Prokurimeve Publike dhe Kodit të Procedurës Administrative, afati më i shpejtë ligjor që drejtuesi i Autoritetit Kontraktor, në rastin konkret, Benet Beci, të njoftojë shpalljen e fituesit është data 9 Mars 2021, pra 7 ditë pasi kalohet afati ligjor nga njoftimi i klasifikimit të operatorëve në mënyrë që pjesëmarrësit në garë të ushtrojnë të drejtën e tyre për të ankimuar klasifikimin e bërë nga KVO-ja e KESH.
Në anën tjetër, Benet Beci, tashmë i zyrtarizuar si kandidat për deputet nga Partia Socialiste në Qarkun e Shkodrës, rezulton të vijojë punën si Administrator i KESH, madje edhe të firmosë tendera, si ky që iu akordua kompanisë Salillari.
Kodi Zgjedhor, në nenin 63, pika g, saktëson se zyrtarët e lartë të administratës shtetërore të përcaktuara nga ligji nuk mund të kandidojnë dhe as të zgjidhen, nëse më parë nuk kanë hequr dorë nga detyra.
Ligji nr 40, neni 4, i vitit 2012, dhe Udhëzimi nr. 9 i datës 24.12.2020 i KQZ përcaktojnë listën e institucioneve shtetërore ku një prej tyre është edhe KESH.
Neni 72 pika 3 e Kodit Zgjedhor sakteson se dokumentacioni i rregjistrimit të kandidatit duhet të përmbajë edhe deklaratën e dorëheqjes nga detyra në përputhje me sa parashikohet në nenin 63 dhe të shoqërohet me dokumentin e dorëheqjes së tij. Në rastin konkret, Benet Beci duhej të kishte paraqitur dorëheqjen pranë Këshillit Mbikqyrës të KESH sh.a.
Afati ligjor për regjistrimin e kandidatëve për deputet ishte data 8 mars, çka do të thotë se para kësaj date, ose orës 00:00 të 8 marsit, Beci duhej të kishte depozituar në Këshillin Mbikqyrës të KESH aktin e dorëheqjes.
Nuk dihet nëse Beci ka dhënë dorëheqjen ose jo, por nëse nuk e ka dhënë ai s´mund të regjistrohej si kandidat për deputet.
Në rast se ai ka dhënë dorëheqjen atëherë kush është administrator që e ka zëvendësuar?
Dhe përballë një situate të tillë, pyetja që shtrohet është: me çfarë autoriteti Beci ka firmosur njoftimin e fituesit të kompanisë Salillari, ose si ka mundësi që KQZ ka regjistruar si kandidat për deputet, duke u renditur i 3-ti në listën shumëemërore të PS në Qarkun e Shkodrës?
Nëse Beci ka firmosur dokumentin e shpalljes së fituesit pasi ka dhënë dorëheqjen, atëherë kemi të bëjmë me një vepër penale, e ngjashme me atë të ish-Kryebashkiakut të Vorës, Agim Kajmaku, i cili pasi humbi mandatin e Kryetarit të Bashkisë, firmosi urdhërin që caktonte në detyrë një nga zv.kryetarët.
Në rast se Beci vijon të jetë në detyrë, atëherë i takon KQZ të sqarojë situatën, dhe të japë argumentet sepse janë shkelur nenet e Kodi Zgjedhor duke e regjistruar si kandidat për deputet në zgjedhjet e 25 prillit.
Kandidati i regjistruar për deputet me datë 8 Mars 2021, nënshkruan një akt ligjor publik me datë 9 Mars 2021 duke i dhënë kompanise Salillari një tender me vlerë mbi 1 milion euro me të shtrenjtë se operatori tjetër në garë (Albstar JV).
Nëse i referohemi ekstraktit historik të KESH në regjistrin elektronik të bizneseve, vërejmë se Administratori i KESH vazhdon të jetë zoti Benet Beci, mandati i të cilit përfundon në shkurt 2022. Nëse për një moment marrim të mirëqënë se nuk ka pasur një përditësim të të dhënave në regjistrin elektronik, atëherë të paktën duhet të kishte një njoftim publik mbi caktimin, qoftë edhe të përkohshëm të Administratorit të ri të KESH-it.
Fakti se nuk ka asnjë njoftim tregon se Benet Beci vijon të mbajë detyrën e administratorit të KESH, vijon të jetë kandidat për deputet i PS, dhe askush nuk mund të përjashtojë mundësinë që mbi ata 500 punonjësit e KESH që ka sot Qarku i Shkodrës, nuk do të ketë presion për të votuar PS-së si forcë politike dhe emrin e Benet Becit si kandidat për deputet.
Benet Beci i jep Salillarit 5 mln euro 7 javë para zgjedhjeve; S’kualifikoi ofertën më të ulët!
