Kandidati për deputet i Partisë Demokratike në zonën e Korçës, Ervin Salianji, u shpreh sot se një nga problemet kryesore në vend është mungesa e investimeve që ka çuar në largimin e shumë të rinjve. Ai shton se është investuar vetëm për fasadë, ndërkohë që perfieria është braktisur totalisht.
Në një intervistë për Faxnews, Salianji u shpreh se kryeministrit Rama i ka rrëshqitur jo vetëm situata por edhe truri.
Salianji u pyet dhe për çështjen e Geron Xhafajt dhe për kandidimin e tij, duke theksuar se kandidimi i tij është regjistruar nga KQZ dhe nuk ka asnjë arsye që të pengohet kjo.
Kandidati i zonës së Korçës nuk la pa thumbuar mazhorancën, teksa u shpreh se PS-ja e respektoi mirë Fatmir Xhafajn, duke e renditur në vend të pasigurtë në listat e Tiranës.
“Ajo është një nga betejat më të rëndësishme. Duket qartë se edhe PS-ja e ka respektuar Xhafën dhe e ka vendosur në fund të listës. Ne nuk kemi pasur përballje personale, por përballje me mafian. Ne nuk na ka ndalur asgjë për të mbrojtur interesat e qytetarëve. Ne nuk na pengon asgjë, as përballja me ata në pushtet. Nuk ka asnjë problematike, unë jam zyrtarisht kandidat dhe nuk ka asgjë që na ndal për fitoren në 25 prill”, tha Salianji.
