Partia Demokratike ka depozituar në KQZ listat e reja të kandidatëve për deputet në zgjedhjet e 25 prillit, ndërsa bien në sy ndryshimet në 3 qarqe, Tiranë, Durrës dhe Shkodër.
Kështu nga lista e Tiranës është hequr emri i Gazment Koduzit, në vend të të cilit ka hyrë Dorian Teliti që zhvendoset nga vendi i 26-të në vendin e 23-të.
Në listën e re futbollisti i Tiranës, Gentian Muça shkon në pozicionin e 26-të në listë.
Deputeti Korab Lita në listën përfundimtare renditet i 33-ti, ndërsa në listën e parë të dorëzuar në KQZ ai ishte në vendin e 34-t. Këtë pozicion në listën e kandidatëve të Tiranës e merr Lediana Fratari, ndërsa Asllan Dogjani kapërcen nga vendi i 36 në vendin 35, duke zëvendësuar Rivelino Çunin, që ishte përfaqësues i komunitetit rom me partinë për Evropianizim dhe Integrim. Rivelino Çuni renditet tashmë i 38 në listën shumëemërore.
Në Durrës është hequr nga lista Riselda Kalia, ndërkohë që vendin e saj e zë Merita Dakovelli, e cila renditet e 15-ta. Artion Bajramaj zbret nga vendi i 17-të në vendin e 19-të dhe vendin e tij e zë Armand Brahimaj.
Në Shkodër ka një “rrokadë” mes dy kandidatëve të FRD-së ku Astrit Kuçi i zë vendin Fatlum Nurjas, në pozicionin e 16-të. Po ashtu është shtuar një kandidat nga PDIU, Liljan Idrizaj në vendin nr.19. Listës së Shkodrës i bashkohen edhe dy emrat që renditen në vendin 20 dhe 21, Imeldi Sokoli dhe Denisa Meçi.
Kujtojmë që KQZ u ktheu gjashtë ditë më parë 6 partive politike, mes të cilave edhe Partisë Demokratike dhe Partisë Socialiste dokumentet e listës së kandidatëve për t’i korrigjuar.
