Mjeku Dhimitër Kraja, anëtari i ri i Komisionit Teknik të Ekspertëve, tha sot se shtimi i rasteve të vdekjeve nga COVID-19 vjen si rezultat i rritjes së numrit të infeksioneve dhe ardhjes vonë për trajtim në spitalet Covid.
Në konferencën e Komitetit Teknik të Ekspertëve lidhur me situatën dhe masat për përballimin e epidemisë, i pyetur nga gazetarët se përse kohët e fundit ka patur një numrit të lartë të fataliteteve në spitale edhe në moshat e reja, Kraja tha se “është shtuar numri i infeksioneve dhe paralelisht do kemi forma të rënda të shtuara dhe do tw kemi përqindjen e vdekjeve që korrespondon kësaj rritje. Është një gjë që ndodh nuk është habi e madhe”.
“Faktori i dytë është që mundet, por kjo do parë me kujdes më vonë, e teprojnë disa persona me trajtimet në shtëpi. Njerëzit e teprojnë se mund të trajtojnë edhe disa variante në shtëpi duke ardhur vonë kalon edhe koha kur spitali mund të ndërhyjë me protokollet e tij për ti shpëtuar”, nënvizoi Kraja.
Sipas tij, ka edhe faktorë genetikë, siç janë në gjithë botën.
“Në Gjermani deri para vjeshtës dhe dimrit mbahej si një nga vendet me vdekshmëri të ulët. Autoritetet gjermane thonë se vjeshta e dimri nga 14-16 mijë e ka çuar numrin e vdekjeve në mbi 71 mijë. Fenomeni i shtimit të vdekjeve në shtete të ndryshme ka paralele të tilla është një fenomen që ne do e luftojmë fort, por ndodh”, tha Kraja.
