Fitorja e zgjedhjeve dhe rikthimi i Joan Laporta-s në krye të Barcelonës kanë rizgjuar entuziazmin në klubin blaugrana dhe një ndër objektivat kryesorë të 58-vjeçarit është afrimi i lojtarëve cilësorë për të ndërtuar sërish një skuadër të madhe.
Presidenti i sapozgjedhur i ka idetë të qarta dhe po planifikon që tani përforcimin e skuadrës. Dy emra përputhen plotësisht me politikën e re të klubit.
E përditshmja spanjolle Mundo Deportivo, që mbetet gjithmonë shumë e vëmendshme ndaj zhvillimeve në kampin blaugrana, ka nxjerrë në dritë emrat e Alabës dhe Agueros. Të dyve iu përfundojnë kontratat respektive me Bajernin e Mynihut dhe Mancester Sitin më datën 30 qershor, kështu që bëhet fjalë për dy futbollistë që do të transferoheshin në “Camp Nou” me koston zero, teksa për më tepër Alaba dhe Aguero e kanë shprehur qartë dëshirën e tyre për të veshur fanellën me ngjyrat e famshme të klubit nga Katalunja.
Menaxherët e mbrojtësit të ekipit bavarez ishin javën e kaluar në qytetin e Barcelonës dhe nga sa zbulon Mundo Deportivo, palët u takuan dhe arritën një pakt verbal, ndërsa sulmuesi i “sky blues” do të ishte tepër i kënaqur të luante në krah të bashkëkombësit të tij, yllit të skuadrës Lionel Messi.
David Alaba do të mbushë 29-vjeç pak ditë përpara mbylljes së kontratës me të kuqtë e Bayernit dhe futbollisti austriak konsiderohet si një ndër lojtarët më të zotë në mbrojtje. Pra bëhet fjalë për një futbollist që është në gjendje t’i mbulojë vërtet shumë mirë që të gjitha rolet në repartin e prapavijës, pa harruar gjithashtu edhe shpejtësinë dhe cilësitë e tij të shkëlqyera, falë të cilave David Alaba është aktivizuar shpesh herë edhe në mesin e fushës. /Supersport
