Presidenti Ilir Meta, këtë të mërkurë deklaroi nga Fieri se të gjithë e kanë kuptuar rëndësinë që ka ndërgjegjësimi i çdo qytetari për pjesëmarrje masive në zgjedhjet e 25 prillit.
Meta tha se vota e qytetarit, është fuqia e vërtetë e demokracisë. “Jam i bindur se këtë fuqi do ta tregojnë më 25 prill”-deklaroi Presidenti.
“Kam qenë gjithmonë në anën e Kushtetutës, të interesit publik dhe kombëtar. Presidenti ka qenë gjithmonë për zgjedhje të lira e të ndershme dhe ka theksuar prej kohësh që në themelet e krizës qëndron kriza e legjitimitetit të institucioneve.”-tha Meta.
Më tej, kreu i shtetit theksoi se janë dosja e Dibrës dhe e Shijakut ato që mbajtën peng vendin për 8 vite, ndërsa shtoi se ka qenë gjithmonë për zgjedhje të lira e të ndershme.
“Presidenti ka vetëm një votë. Vota e tij duhet të jetë e barabartë me votën e qytetarit më të thjeshtë. Presidenti do që çdo qytetar të ndërgjegjësohet se vetëm përmes votës ai do të hapë një rrugë të re për veten e tij dhe për shoqërinë tonë.”-shtoi Meta.
Ai theksoi se me votë duhet ndëshkuar kushdo që nuk ka mbajtur premtimet. “Kur flas për referendum më 25 prill e them sepse është vendosur në pikëpyetje e ardhmja europiane e Shqipërisë.”-tha ai.
