Alket Hyseni është tërhequr nga gara për deputet në zgjedhjet e 25 prillit, pasi u rendit i 11-ti në listën e kandidatëve të Partisë Socialiste.
Nga raportimet mësohet se Hyseni ka kërkuar tërheqjen nga gara, ndërsa më parë Kryeministri Edi Rama tha se deputeti, emrin e të cilit nuk e përmendi, kishte shprehur pakënaqësi.
““Kam dijeni për një rast mbrëmë vonë një kandidat që ishte shumë i bindur që nuk duhet të ishte aty dhe që thoshte se unë do bëj gjithçka po nuk dua të jem në këtë pozicion”, tha Rama.
Por duket se deputeti socialist i Vlorës nuk ka krijuar asnjë problem për socialistët, që kanë menduar t´a zëvendësojnë me Leonard Beqiraj.
Ky i fundit është prezantuar nga Damian Gjiknuri, i cili prej muajsh luan rolin e drejtuesit të fushatës së socialistëve në Vlorë.
Në zgjedhjet e vitit 2017, Beqiraj kandidoi për Partinë Social Demokratike, pas marrjes së kësaj force politike nga Tom Doshi.
Vendosja e tij në listat e Vlorës duket si një koalicion jo zyrtar mes Tom Doshit dhe Edi Ramës.
Për zgjedhjet e 25 prillit Rama ka prezantuar kandidatët për deputet, ndërsa rreth 40 % e ligjvënësve aktualë u lanë jashtë listave, mes të cilëve edhe Musa Ulqini, Besnik Bare, Eglantina Gjermeni, Vasilika Hysi dhe Sadri Abazi.
Ndërkohë që të tjerë emra si Pandeli majko, Fatmir Xhafaj, Spartak Braho apo Mimi Kodheli ndodhen në një zonë aspak të sigurtë të listës.
