Nga Boldnews.al
Disa javë më parë, kryeministri Edi Rama, deklaroi me zell se Turqia do të ndërtojë falas një spital në qytetin e Fierit. Shqipëria do të kishte “0” lekë investime, ndërsa i gjithë projekti ishte një “dhuratë” nga miku i tij Erdogan.
Ky i fundit, sipas Ramës, e kishte siguruar se spitali do të ndërtohej para zgjedhjeve të 25 prillit. Punimet kanë vijuar, teksa në terren është parë një godinë njëkatëshe, e shtrirë në një sipërfaqe të mëdha. Vetëm një godinë e vogël do të jetë dykatëshe, teksa konstruksionet e lehta janë vendosur dhe janë drejt fundit. Por, pavarësisht deklaratës së kryeministrit se investimi ishte totalisht me të ardhurat e Turqisë, BoldNews ka siguruar disa dokumente që tregojnë se Këshilli i Qarkut Fier ka investuar plot 100 mijë euro për gjelbërimin e ambienteve.
Disa muaj më parë, kryeministri Edi Rama tha se “Spitali i ri Rajonal i Fierit po ndërtohet nga qeveria turke”. Megjithatë, edhe shqiptarët po paguajnë për atë ndërtim. Sipas dokumenteve që ka siguruar BoldNews, Këshilli i Qarkut Fier ka hapur tenderin me objekt “furnizim, vendosje pemësh për gjelbërimin e Spitalit Rajonal Memorial Fier”. Fondi limit për këtë tender është 10.791.753 lekë pa tvsh, ose 100 mijë euro me TVSH. Mësohet se kohëzgjatja e kontratës ose afati kohor për ekzekutimin është vetëm 10 ditë kalendarike nga momenti i lidhjes së kontratës. Tenderi do të zhvillohet në datën 19 mars 2021 dhe brenda këtij muaji do të vendoset edhe gjelbërimi, duke kërkuar që përurimi të bëhet sa më shpejt të jetë e mundur, mundësisht para zgjedhjeve të 25 prillit.
Kryetarja e Këshillit të Qarkut Fier, Evis Sema, ka bërë me shpejtësi dokumentet e tenderit, duke kërkuar që i gjithë shërbimi të bëhet vetëm për 10 ditë. Ajo kërkon drurë dekorativ mimoza me lartësi 16-18 cm, camfora, manjola, bli, fotini të gjitha me gjatësi 16-18 cm. Gjithashtu kërkon drurë dekorativ “Oleander” me gjatësi 75 cm, 10 kg pleh organik, 5 kg rrënjë dru dekorativ dhe rrënjë shkurre.
