Mjeku epidemiolog Erion Dasho ka ngritur alarmin mbi atë që është duke ndodhur në vendin tonë si pasojë e COVID19.
Në një postim në rrjetet sociale, doktori shkruan se e keqja nuk ka kaluar, sa kohë ka informacion të cunguar për variantet e reja të koronavirusit, si edhe vaksinat që janë me pikatore.
“Rreth një vit më parë nisa me miqtë e mi në ‘FB’ fushatën ‘nuk është grip’. Synonte të bindte kundërshtarët e masave anti-COVID se, në kushtet e një patogjeni të panjohur, lockdown ishte e vetmja zgjidhje afatshkurtër duke u paraqitur ato pak informacione dhe njohuri që kishim në dorë deri atë kohë. Duke filluar nga muaji prill e deri më sot kam bërë thirrje pothuajse të përditshme se menaxhimi i epidemisë duhet të lihet në dorën dhe përgjegjësinë e ekspertëve. Fatkeqësisht, jemi në situatën kur ekspertët shqiptarë në Shqipëri dhe botë nuk u dëgjuan dhe sot Shqipëria është katandisur në Wuhan-in e 2021-it! E keqja nuk ka kaluar. Variantet e reja të virusit ende nuk janë studiuar plotësisht dhe mund ta kenë ndryshuar rrjedhën e epidemisë. Vaksina ende nuk ka ardhur në Shqipëri në sasitë e nevojshme dhe nuk ka gjasa të vijë së shpejti”, shkruan Dasho.
Doktori shkon edhe më tej kur thotë se jemi një hap larg parashikimit të zymtë për 12 mijë vdekje nga virusi, ndërsa apelon që të ndërmerren masa urgjente duke nisur nga rritja e numrit të testimeve. Sipas ekspertit të shëndetit publik, përpjekja për kontrollin e COVID u duhet lënë në dorë profesionistëve, jo politikanëve.
“Me rëndësi është edhe vaksinimi. Me një program të qartë, logjistikë të besueshme, kontrata furnizimi transparente dhe afate realiste. Jo vaksinim elektoral në stadiume dhe pallate sporti, por në qendra shëndetësore dhe spitale, aty ku me një organizim të mirë mund të vaksinohen disa dhjetëra mijë shqiptarë në ditë. Por mbi të gjitha, gjithçka kthehet te rekomandimi i parë. Përpjekja për kontrollin e COVID u duhet lënë në dorë profesionistëve, jo politikanëve dhe puthadorëve të tyre. Pa këtë hap të parë të domosdoshëm, asgjë e mirë nuk do të vijë”, mbyll statusin e tij Dasho.
