Ministrja e Shëndetësisë, Ogerta Manastirliu tha këtë të Martë se vaksinimi i të gjithë stafeve mjekësore pritet të përfundojë brenda 15 marsit.
“Të gjithë mjekët dhe infermierët mbarojnë vaksinimin brenda 15 marsit. Sepse ka edhe mjekë, infermierë, të cilët praktikisht janë duke u vlerësuar që e kanë kaluar dhe mund ta bëjnë në një fazë të dytë. Pra, po bëhet një vlerësim dinamik. Janë kryer më shumë se 11 mijë vaksinime për mjekët dhe infermierët”, tha Manastirliu nga Durrësi, ku pa nga afër vaksinimin e të moshuarve mbi 80 vjeç.
Duke folur për vijimin e procesit të vaksinimit, Manastirliu bëri me dije se me ardhjen e vaksinave të AstraZeneca, do të fillojë vaksinimi i mësuesve.
“Do të fillojmë me mësuesit. Do të bëhet një vaksinim, siç e kemi menduar, në shkolla. Ndaj jemi duke përzgjedhur edhe infermierët të cilët fillojnë trajnimin brenda kësaj jave”, bëri me dije Manastirliu.
Mbi 32 mijë vaksina të Pfizer kanë mbërritur deri tani në Shqipëri, ndërsa pritet të vijojë furnizimi nga kontrata direkte me Pfizer, përgjatë muajit Mars, Prill e në vijim, bën me dije Ministria e Shëndetësisë.
Ndërsa, nëpërmjet instrumentit COVAX, pritet të mbërrijnë brenda dy javëve të para të Marsit, 14,400 vaksina AstraZeneca dhe po vijojnë përpjeket për sigurimin e dozave të tjera të vaksinove, sipas të njëjtave burime.
