Basketbollisti i Tiranës, Gerti Shima, ka fajësuar ekipin pritës të Vllaznisë si shkaktar të rasteve të dhunës së shfaqur në kryesfidën e javës së 6-të të Superligës. Në një prononcim për “Panorama Sport”, Shima i penalizuar edhe ai vetë me teknikë përjashtimi, sqaron se ka qenë trajneri i Vllaznisë i pari që ka goditur me grusht Erkand Karajn.
“Në këto gjashtë vite unë kam luajtur në nivele jo të kampionatit shqiptar dhe nuk kam pasur ndonjë problem të tillë. Në fakt, klubi i Vllaznisë i ka prerë pamjet televizive sipas interesave të veta. Për dijeni, videoja nuk është e plotë. Incidenti ka nisur nga lojtarët e Vllaznisë dhe kjo është shumë e qartë nëse do të merret e plotë videoja. Unë nuk po dal këtu të fajësoj ata dhe të mbroj Tiranën.
Momenti i parë ka qenë kur Xhonson është kapur me numrin shtatë të Vllaznisë, pa dashur të gaboj me emrin. Ndërkohë që lojtari tjetër amerikan, Grifin, është futur për t’i ndarë. Por në momentin që ai ka ndërhyrë, një nga vëllezërit Lekndreaj e ka shtyrë lojtarin tonë. Nga ai çast ka nisur edhe tensioni, është futur stoli i Vllaznisë, ka ardhur trajneri i Vllaznisë deri te pankina jonë.
Më pas u fut edhe stoli ynë, normale kjo gjë. Gabim ka qenë nga të dy krahët, por që nuk mund të kapemi te videot që ka publikuar klubi tjetër ku Karaj ka goditur Gjeçajn. Në fakt, ka qenë Bledari, i cili ka goditur i pari Karajn”, deklaroi fillimisht lojtari i përvojës ndërkombëtare, Gerti Shima.
Sipas tij, Vllaznia i ka të zakonshme të tilla situata. “Në fakt, këto episode nuk ndodhin për herë të parë nga ana e klubit shkodran, këtu edhe si për trajnerin. Unë e kam pasur bashkëlojtar dhe trajner në ekipet kombëtare, por që nuk është e hijshme dhe nuk ndihmojnë askënd. Me sa dëgjova pas lojës edhe për lojtarët e përfshirë, nuk është hera e parë që ndodhin këto situata si me zënka mes lojtarëve kundërshtarë, ashtu edhe me tifozë.
Unë vetëm e kisha dëgjuar, ndërsa dje e vërtetova. Në momentin e parë të sherrit nuk jam përfshirë fare. Por duke parë që lojtarët e Vllaznisë filluan të shtynin lojtarët e Tiranës, nuk kam shkuar të bëj sherr, por thjesht për të qetësuar situatën. Dhe pikërisht në atë moment duket qartazi një reagim që ka ardhur ndaj meje nga një 17-vjeçar, që është një turp i basketbollit.
E pikërisht ai lojtar i ri më vë dorën në fyt. Por ky është skandal. Dhe çuditërisht ai prapë vazhdoi të luante. Kush është fajtori kryesor të dënohet, por drejtësia të merret siç duhet. Të merren provat dhe të shikohet se kush ka provokuar e kush ka shtyrë”, shtoi Shima.
Ai vuri në dukje se arbitrat i komunikuan se ishte penalizuar me pa të drejtë. “Si kapiten i kombëtares nuk ka ndodhur kurrë që të kemi goditur ndonjë lojtar kundërshtar. Nëse Vllaznia tregohet aq klub i madh sa ç’pretendon, le ta bëjë transparencën e plotë dhe më pas të merren masat për gjithsecilin”. Panorama Sport
