Presidenti i Partizanit, Gaz Demi mbrëmë ishte i ftuar në emisionin Zona Gol në Supersport. Si gjithmonë i drejtpërdrejt kreu i të kuqve, që foli për ecurinë në kampionat, ndeshjen me Laçin, dhe Ilir Dajën.
Tifozeria– “Nuk është se e ndjek shumë futbollin, por jam tifoz me Interin, kundër Edi Ramës dhe Erion Braçes”.
Pengu i këtij sezoni – “Të jem korrekt, Apolonia. Shumë peng më ka mbetur. Sepse e meritoi Apolonia barazimin me ne herën e fundit. Në 10 minutat e fundit, Apolonia ishte Partizani dhe Partizani Apolonia”.
Ilir Daja -“Ilir Daja është blerja më e mirë e vitit falë drejtorit. Me Ilirin shpresoj të dal në pension. Është një burrë fisnik. Shpresojmë të bëjmë një Partizan të madh. Po nuk u bë akademia jonë dhe fusha jonë, nuk them dot asnjë gjë. Gjithçka mbeten barcaleta.
Nuk ka asnjë lidhje titulli këtë vit me Dajën, nuk ka asnjë presion ndaj tij, edhe pse jemi në rrugë të mbarë. Kemi një marrëveshje xhentëlmenësh, që të shkojmë larg e më larg. Ju e dini si e nisëm këtë vit. Nuk ka presion te Daja”.
Stadiumi– “Doli diçka nga politika e ca të tjerë, që s’dua të përmend emra, që folën për Partizanin. Investimi thuajse ka mbaruar. Janë ca burokracira dhe magazina, që s’i kuptoj. Partizani duhej të dilte në fushën e vet që këtë vit. Të mos bëjmë shpenzime të mëdha.
Të shikojmë me këtë ministrin e ri, Peleshin. Drejtorët e mi do të ikin të hënën të takohen. Është e sigurt që këtë muaj Partizani del në fushë nëse mbyllet marrëveshja me ministrinë.
Kompleksi ende s’ka përfunduar, por fusha është gati. Është i vetmi klub, që s’ka asnjë mbështetje. Jam taksapagues i madh për sportin te ‘Rilindja’. Pa shtëpi, s’kemi si i edukojmë fëmijët.
Është bërë një investim që qeveria, politika duhej të dilnin dhe t’u puthnin dorën drejtuesve të Partizanit. Është bërë një ambient për brezat e ri. E kam bërë, erdhi dhe federata dhe inspektoi fushën. Kemi folur këto vite për Skënderbeun.
Bashkia e Korçës gjithmonë e ka mbështetur. Tirana merr bakshish nga bashkia kur fiton titullin, ne jo, që punojmë vetëm me krahët tona. Partizani nuk është i Gaz Demit, por i të gjithëve”.
Laçi – “Për të qenë korrekt ishte barazim. Më ngeli peng kur dolëm në avantazh dhe ata na barazuan. Na iku mundësia e shkëputjes me Laçin. Është me meritë aty ku është. Do të jetë pretendent i fortë deri në fund”.
Gara për titullin – Jemi një grup prej 4 skuadrash (Partizani, Vllaznia, Laçi dhe Teuta) për titullin. Shpresoj që ekipi im të mos bëj gabime”, përfundoi Demi. /abcnews.al
