Në Shqipëri janë realizuar rreth 11 mijë vaksina anti-Covid, ndërkohë që vaksinimet vijojnë me fashën 80 vjeç e lart. Kjo u bë e ditur nga ministrja e Shëndetësisë, Ogerta Manastirliu, e cila sqaroi se po vijon edhe vaksinimi i personelit shëndetësor spitalor dhe të kujdesit shëndetësor parësor.
Vaksinimi vijon të përdoret si një show dhe propogandë nga Qeveria edhe pse po ecet me ritme shumë të ngadalta dhe nuk ka asnjë perspektivë të qartë lidhur me ecurinë e procesit.
Ajo që tërheq vëmendjen duket se sa më pranë afrimit të zgjedhjeve, aq më shumë strukturat qeveritare do të rrisin numrat e të vaksinuarve, duke e lidhur direkt këtë proces shëndetësor dhe jetik me procesin elektoral.
Duke folur për intensifikimin e procesit të vaksinimit, Manastirliu u shpreh se do të vijnë sasitë e radhës së vaksinave, duke filluar nga java tjetër.
“Javën tjetër do të vijë dërgesa e radhës nga Pfizer. Me ardhjen e vaksinave, sipas kalendarit të kontratës që kemi lidhur me Pfizer-in, ditën e hënë do të vijojmë të intensifikojmë dhe të shtrijmë në vijim vaksinimin. Gjithashtu pritet që në 10 ditëshin e parë të Marsit, të kemi edhe një dërgesë të parë nga kontrata me Covax-in.
Janë planifikuar rreth 14,400 doza, të cilat priten që të vijnë nga kjo marrëveshje e lidhur dhe e parapaguar nga qeveria shqiptare”, bëri me dije Manastirliu.
Sipas saj, me përfundimin e mjekëve, infermierëve, gjithë personelit shëndetësor, me përfundimin e vaksinimit të të moshuarve në azile, kujdestarëve të tyre, gjithashtu do të intensifikojmë edhe vaksinimin e të moshuarve dhe do të vijojmë edhe përgjatë ditës së dielë me vaksinimin e të moshuarve +80 dhe +90 vjeç.
Ndërkohë, Qeveria ka lënë jashtë kategorive që mund të vaksinoheshin me përparësi mësuesit dhe pedagogët.
