Komiteti Teknik i Ekspertëve do të mblidhet mesditën e sotme për të përcaktuar masat e reja ose për të lënë në fuqi ato ekzistuese lidhur me pandeminë e Covid-19.
Ajo që dihet është se bazuar në rastet e reja ditore, numrin e vdekjeve si dhe numrin e pacientëve të shtruar në spitale, nuk do të ketë një lehtësim të masave.
Prej disa ditësh është hedhur idea për vendosjen e një ore të re policore, duke afruar me dy orë, ndalim qarkullimin, nga ora 20:00 që është sot në orën 18:00.
Ndërkohë që ka pasur propozime edhe për një mbyllje të paktën dy javore të disa prej shërbimeve që mendohet se ndikojnë në përhapjen e koronavirusit, sikundër është transporti publik, baret apo restorantet.
Gjithsesi në kushtet e një krize ekonomike dhe kur Qeveria duket qartazi që s´ka mundësi të rikuperojë humbjet që mund të pësojnë bizneset dhe rrjedhimisht ekonomia, ky variant mbetet pothuajse i pazbatuar.
Një ditë më parë në vendin tonë janë konfirmuar të infektuar me Covid 1021 raste të reja duke e çuar në 103,327 numrin e të infektuarve mes të cilëve kanë humbur jetën 1,715 persona.
Ekspertë të shëndetit publik shprehen se aktualisht Shqipëria ndodhet në atë që quhet si zona e sheshtë e pikut të rasteve me Covid, ndërsa parashikohet një rënie e rasteve ditore në javën e parë të muajit mars.
Gjithsesi këto mbeten vetëm parashikime, pasi që nga momenti i shfaqjes së pandemisë në vend, autoritetet nuk kanë mundur të nxjerrin shifrat reale të të infektuarve, kjo për faktin e testimeve të kufizuara që bëjnë. Edhe pas 1 viti nga shfaqja e pandemisë, në Shqipëri shifrat e testimeve kurrë nuk arritën shifrën e 5 mijë testimeve në ditë.
