Mesfushori i Partizanit, Rron Broja, ka folur hapur për të ardhmen e tij. 24-vjeçari pranoi se menaxherët e tij po punojnë për të gjetur një ekip të ri në verë, duke shpresuar që transferimi i ardhshëm të mos dështojë si ai transferim te Sivaspori disa vite më parë.
Gjithashtu, Broja u shpreh për “Koha.net” se dëshiron edhe të grumbullohet nga përfaqësuesja e Kosovës, ndërsa për sezonin aktual me Partizanin, shpreson të fitojë titullin kampion.
“Deri në fund të këtij sezoni, jam pjesë e Partizanit e më pas të shohim, sepse më përfundon kontrata. Ka fjalë nga menaxherët dhe shpresoj të bëhet diku. Fundi i sezonit vjen shumë shpejt, por besoj që do të bëhet diku këtë herë. Shpresoj të dalim edhe kampionë me Partizanin dhe pastaj, do të jetë edhe më e lehtë për mua”.
