Ka ndërruar jetë në moshën 53-vjeçare dekani i Fakultetit të Gjuhëve të Huaja, Artur Sula. Prej disa ditësh Sula ndodhej i shtruar në spital, pas pësimit të një hemoragjie celebrale.
Ish-ministrja e Kulturës, Mirela Kumbaro, një postim që ka bërë në rrjetet sociale, shpreh trishtim për ndarjen e tij nga jeta në një moshë kaq të re.
“Mba dorën o zot..! Shumë i ri për ta humbur familja, shumë energjik për t’ia hequr jetës, shumë ambicioz për të ikur nga drejtimi i Fakulteti i Gjuhëve të Huaja, shume bujar për ta ndarë nga shokët e kolegët, shume e padrejtë mbyllja këtu e rrugëtimit premtues të dekanit të Gjuheve të Huaja Artur Sula. Lamtumirë Shok i dashur!”, shkruan Kumbaro.
Ndërkohë kryetari i Departamentit të Politikës së Jashtme në Partinë Demokratike të Shqipërisë, Kreshnik Çollaku, ka prekur me fjalët për kolegun e tij duke thënë se do të ngelet gjithmonë miku i tij.
“U endëm bashkë korridoreve e klasave të së njëjtës shkollë të mesme e më tej auditoreve të universitetit..,e më pas u bëmë kolegë! Më pas ti ishe drejtues i departamentit e së fundmi dekan i fakultetit ku ne studiuam dhe më pas u bëmë profesorë.
Në këtë udhëtim përgjatë 30 viteve, nëse studente apo profesorë, nëse drejtues apo dekan, ti mbete i njëjti. Ti mbete i njëjti Turi shok e mik. Sa here të takoja harroja se ishe dekani por ai Turi që linim mësimin për të pirë cigare fshehur pas shkolles së mesme të Gjuhëve të Huaja, apo për të organizuar ndonjë feste ose dëgjuar muzikë të ndaluar. Vendose të ikësh shpejt, për të lënë pas kujtimin e një shoku e miku të mire që koha e jeta nuk e ndryshoi kurrë deri në orën e fundit.
Lamtumirë Turi,prehu në Paqe të Zotit tani !!”- shkruan ai.
