Kryeministri Edi Rama ka komentuar nga ambientet e jashtme të stadiumit të kthyer në qendër vaksinimi, “Air Albania”, deklaratat denoncuese të qytetarëve për vjedhjet dhe shërbimin në spitalin Infektiv.
Rama tha për zonjën që denoncoi vjedhjen e sendeve të të atit se, ajo nuk ka ndjekur procedurën dhe se në momentin kur ka dorëzuar kartën e identitetit, i ka marrë mbrapsht ato.
Ndërsa për rastin e dy vajzave që pretendojnë se i ati i tyre, Rifat Lalo, ndërroi jetë pa kurrfarë shërbimi mjekësor, në të ftohtë, Rama u shpreh se e kupton dhimbjen e tyre por kjo nuk është arsye për t’ua faturuar mjekëve.
Kryeministri ia faturoi gjithçka mediave, duke thënë se informacioni i përcjellë është gjysmak, jo i vërtetë.
“Një zonjë pretendonte që as rrobat e të vdekurit nuk i marrin. E vërteta e thjeshtë ishte se zonja nuk kishte kartën e identitetit me vete. Njerëzve iu dha një informacion gjysmak si për ato që kishin humbur babanë.
Informacioni nuk kishte asnjë të vërtetë. Ju lutem shumë, është ndjeshmëri e lartë. Natyrisht që rastet e abuzuesve dhe batakçinjve si ato që shkuan pas hekurave, nuk mjaftojnë për të njollosur të gjithë ata njerëz që bëjnë punë heroike dhe nuk e meritojnë të gozhdohen nga balta. Me respekt për ata që kanë dhimbje.
I mirëkuptoj ata që nga dhimbja fatkeqësinë ia faturojnë mjekëve… Ne nuk kemi të drejtën të pretendojmë se punët janë perfekte. Çdo punë ka defekte sepse punë perfekte nuk ka. Ju lutem, njerëzit kanë nevojë për të vërtetën dhe për t’i dëgjuar të dyja palët dhe jo çdo kënd që del te gardhi i Infektivit”, -tha Rama.
