Spitali Shefqet Ndroqi, i njohur muajt e fundit si “Covid2” ka ezauruar shtretërit, çka do të thotë se nuk mund të presë më pacientë të rinj me Covid-19.
Nga raportimet mësohet se ky spital do të pranojë pacientë me Covid, vetëm nëse lirohen shtretërit.
Një ditë më parë Ministria e Shëndetësisë deklaroi se në spitalet Covid po trajtohej 531 pacientë, nga 550 shtretër që kanë në total 4 spitalet ku trajtohen të prekurit nga koronavirusi.
Duket se kjo situatë ka detyruar Qeverinë dhe strukturat shëndetësore që të prekurit me koronavirus të trajtohen në spitalet rajonale dhe të mos transportohen drejt Tiranës, sikundër ka ndodhur deri më sot.
Situata nga pandemia në Shqipëri ka dalë jashtë kontrollit dhe prej fillimit të muajit shkurt raportohen zyrtarisht mbi 1 mijë raste të reja në ditë, ndërkohë që ka një shifër dyshifrore ditore lidhur me humbjet e jetëve.
Në 24 orët e fundit në vendin tonë janë infektuar me Covid 1088 raste të reja dhe 12 humbje jetë.
Ndërkohë deri më tani numri i përgjithshëm i të infektuarve me Covid në vendin tonë ka shkuar në 93,075 pacientë mes të cilëve kanë humbur jetën 1555 persona.
