Reshjet e dëborës që kanë përfshirë vendin gjatë orëve të fundit kanë krijuar probleme të shumta në akset rrugore. Pavarësisht njoftimeve të ditëve më parë mbi përkeqësimin e motit duke se strukturat e shtetit dhe kompanitë që mirëmbajnë rrugët janë kapur të papërgatitura.
Dhe në kushtet kur nuk mund të garantojnë lëvizjen, duket se institucionet kanë zgjedhur t´i kërkojnë qytetarëve që të evitojnë lëvizjet.
Përveç zonës së Nënshkodrës ku po ndihmohen banorët e prekur nga përmbytja, Forcat e Ushtrisë po ndihmojnë edhe në zonat e tjera të vendit.
Aksi Korçë-Kapshticë po pastrohet me një borë pastruese.
Nëpërmjet një deklarate, Ministria e Mbrojtjes u kërkon qytetarëve që të evitojnë lëvizjet jo të domosdoshme.
“I gjithë territori i vendit tonë ditën e sotme është mbizotëruar nga reshje shiu me intensitet mesatar dhe me reshje dëbore. Si rezultat i reshjeve të borës në disa qarqe të vendit kemi pasur problematika në disa akse rrugore.
Ditët në vijim pritet mot i kthjellët, por për shkak të temperaturave të ulëta do të ketë ngrica në rrugë.
Ditën e djeshme si rezultat i reshjeve të borës është bllokuar aksi rrugor Milot-Lezhë. Situata ishte shumë e vështirë pasi 2 kamionë ishin përplasur me njëri-tjetrin dhe ishte e pamundur qarkullimi i mjeteve. Është organizuar puna me forca dhe mjete si dhe batanije dhe karburant për automjetet e bllokuara në këtë aks rrugor. Pas një pune të gjatë aksi rrugor është hapur me vështirësi në orët e para të mëngjesit të ditës së sotme dhe ka filluar qarkullimi i mjeteve”, thuhet në njoftimin e Ministrisë së Mbrojtjes.
Në vijim, theksohet se si pasojë e reshjeve të borës, ditën e djeshme ka pasur bllokim të aksit rrugor Elbasan- Librazhd.
Në vendngjarje kanë shkuar forca të policisë së shtetit dhe firma kontraktore të cilët kanë punuar për normalizimin e situatës. Nga informacioni i marrë sot në mëngjes aksi rrugor është i kalueshëm pjesërisht me zinxhirë.
Forcat e Armatosura në bashkëpunim me Policinë e Shtetit kanë rritur gatishmërinë në të gjithë vendin për t’u ardhur në ndihmë qytetarëve.
Aktualisht trupat dhe mjetet e FA janë të angazhuara në zonën e Nënshkodrës për të ndihmuar lëvizjen e qytetarëve në njësitë administrative Ana e Malit dhe Dajç, të prekura nga përmbytjet.
Një borëpastruese e Detashmentit të Mbrojtjes Rajonale të Drenovës është angazhuar për pastrimin e aksit Korçë-Kapshticë.
