Ylli i “TikTok”-ut, Dazharia Shaffer, e njohur ndryshe si Dee, i ka dhënë fund jetës në moshën 18-vjeçare. Ngjarja e rëndë ka ndodhur të hënën, pasi ka publikuar një video në rrjetet sociale.
“Daily Mail” shkruan se lajmin e trishtë e kanë konfirmuar prindërit e saj përmes postimeve në rrjetet sociale. Babai i së ndjerës, Raheem Alla, postoi në “TikTok” disa fotografi të 18-vjeçares dhe falënderonte të gjithë ata që i kanë qëndruar pranë në këtë periudhë të vështirë.
“Për fat të keq, ajo nuk është më me ne dhe ka shkuar në një vend më të mirë”, shkruan Raheem, i cili rrëfeu gjithashtu se adoleshentja kishte probleme të shëndetit mendor.
“Ajo ishte mikja ime më e mirë dhe nuk isha kurrsesi i përgatitur për të varrosur fëmijën tim. Ishte kaq e lumtur, do doja të kishte folur me mua për gjërat që e shqetësonin dhe mendimet e vetëvrasjes. Mund t’ia kishim dalë. Tani vij në shtëpi dhe ti nuk je aty për të më pritur. Duhet të të lë të fluturosh me engjëjt”, ka shtuar babai i saj.
“Daily Mail” shkruan se Dazharia u shndërrua me shpejtësi në një fenomen të “TikTok”-ut, ku mblodhi plot 1.4 milionë ndjekës. Vetëm një ditë para se të ndërronte jetë, Dazharia postoi një seri videosh në Instagramin e saj me titullin, “postimi i fundit”.
