Ben Blushi ka akuzuar ashpër sonte edhe kreun LSI-së, Ilir Meta.
Sipas drejtuesit të LIBRA-s, LSI-ja nuk mbron asnjë kauzë dhe se thjesht i plotëson numrat Ramës
“LSI është një parti që nuk mbron asnjë kauzë. Vetëm përpiqet të plotësojë numrat e domosdoshëm në parlament që kauzat të kalojnë me 71 numra. Edhe kur është në koalicion me Berishën edhe kur është në koalicion me Rilindjen. Të marrim disa raste. Unë ju thashë për çfarë kam qenë kundër këto 3 vite.
Edhe unë kam qenë në këtë koalicion, për premtimet që kemi dhënë në 2013. Për shkak se konstatova shumë herë se një numër shumë i madh premtimesh, nisur nga taksa për të varfrit, mbështetja për bujqësinë, naftë pa akcizë, 300 mijë vende pune, shëndetësi falas, e ca premtime të tjera që asnjëra nuk është mbajtur unë fillova të flas të votoj kundër.
Më thoni diçka që LSI e ka votuar kundër? Ligjin e mbetjeve ende jo, akoma, e votoi megjithëse kishte votuar pro në 2011, kundër në 2013 dhe prapë pro në 2016. Unike apo jo. Një parti voton 3 herë ndryshme të njëjtin ligj. Ligjin e arsimit të lartë e ka votuar pro, të pronave, pro. Ka ndonjë diferencë me rilindjen? Për mua nuk ka asnjë diferencë.
E vetmja diferencë u duk këto 6 muaj, e mund të jua them. E kjo është për të qeshur: Rilindja kam thënë është një grup politik që nuk e zgjedh kryetarin, e kur kishte mundësi për të bërë zgjedhje nuk i bëri. Kurse LSI-ja ndryshe nga Rilindja që nuk e zgjedh kryetarin, e di ça bën: Zgjedh kandidatët e kryetarit. Se kështu ndodhi edhe në këto zgjedhje që pamë në LSI para 1 jave”, tha Blushi gjatë intervistës për Çim Pekën në syri.net.
