Gjermanët dolën hapur dhe kanë të drejtë pasi për përfaqësuese të tilla si ajo e pancerave ndeshjet ndaj ekipeve si San Marino është mirë të mos i luajnë fare.
Në Europë do të ishte më mirë të ndryshohej formati i kualifikueseve sepse disa skuadra si për shembull, Gjibraltari, San Marino apo Andorra nuk e kanë potencialin për të përballur as me skuadra mesatare e jo më e me gjigandët e kontinentit, siç janë Gjermania, Spanja, Italia, Franca, Portugalia e Anglia.
Për të kuptuar se cilat janë përfaqësueset më të dobëta në Europë mjafton ti hedhim një sy renditjes së Fifa-s.
Gjibraltari pozicionohet në vendin e 205-të, pikërisht në atë të fundit përkrah skuadrave të tilla Tonga, Somalia dhe Bahamasi.
E dyta më e dobët në Europë është Andorra që renditet e 203-ta në Botë, për të vazhduar me San Marinon, Lihtenshtejnin e Maltën.
Rekordin përsa i përket ndeshjeve pa fitore e mban Andorra.
Vendi i vogël në kufi me Spanjën dhe Francën ka plot 86 ndeshje që nuk fiton, me triumfin e fundit që daton 12 vite më parë në shtëpi ndaj Maqedonisë.
Ecuria negative e Andorrës është një rekord absolut sepse Luksemburgu nga 1995 në 2006-ën regjistroi 82 ndeshje pa fitore.
