Migen Memelli do të jetë trajneri i ri i Skënderbeut. Presidenti Ardian Takaj ka vendosur për “timonierin” e ri dhe ish-sulmuesi i njohur është përzgjedhur për të drejtuar në vazhdim ekipin.
Një përgjegjësi e madhe, por njëkohësisht edhe luks i madh për Memellin, i cili kalon nga drejtimi i moshave te Akademia e Redi Jupit në krye të një skuadre që ka bërë historinë në elitën e futbollit shqiptar.
Prezantimi i tij pritet të bëhet gjatë ditës së sotme. Një sfidë e vështirë për pogradecarin i cili merr drejtimin e bardhekuqve në një situatë mjaft delikate. Vendi i parafundit në tabelën e klasifikimit dhe vetëm 12 pikë kanë arritur të grumbullojë në këtë sezon futbollistik ekipi i Skënderbeut.
Kujtojmë që më parë, Migen Memelli ka qenë si trajner moshash te Tirana U-19, duke arritur të ndërtojë një grup mjaft të mirë me elementë që tanimë po i shërbejnë ekipit të parë të kampionëve.
