Ditën e djeshme gazeta Mundo Deportivo zbardhi kontratën e fundit të Lionel Messit te Barcelona, e firmosur në verën e vitit 2017, nga e cila Leo mund të përfitonte 555 milionë euro, ndërkohë që kishte marrë 511 deri më tani, 6 muaj para fundit të saj.
Pas kësaj ngjarje Barcelona dhe Messi nisën proceset gjyqësore dhe hetimet për autorin e zbardhjes së kësaj kontrate.
Në bankën e të akuzuarve pritet të jetë edhe ish-presidenti, Josep Maria Bartomeu. Ky i fundit ka reaguar për herë të parë pas publikimit të kontratës.
Bartomeu indirekt lë të kuptohet se nuk është ai autori i nxjerrjes së kontratës dhe tregon kjo çështje është shumë serioze sepse çdo gjë do të diskutohet në gjyq. Sipas Bartomeut, Messi e meriton pagën prej rreth 138 milionësh euro në sezon.
“Është një problem shumë serioz. Është tërësisht e paligjshme të publikosh detaje të kontratave profesionale. Të flasësh në televizion dhe të akuzosh është shumë e lehtë, por nuk është shaka sepse kjo histori do përfundojë në gjyq.
Messi e meriton plotësisht atë që fiton, fillimisht për aftësitë e tij dhe gjithashtu për gjithë ato sponsorë që ai ‘thith’ për klubin. Pa pandeminë, Barcelona mund ta kishte paguar Leon në mënyrë perfekte”, u shpreh ish-presidenti.
