Vrasja e Shkëlen Kastratit, ndodhur këtë të Hënë në Fier, dyshohet se ka lidhje me një histori hakmarrje mes dy fiseve.
Shkëlen Kastrati është vëllai i Kelmend Kastratit, shënjestra e një atentati të ndodhur disa vite më parë, siç zbuluan hetimet e prokurorisë.
Atentati me 1 viktimë më 8 Janar 2016
Mbrëmjen e 8 Janarit, Denis Kasa mbeti viktimë e një atentati me armë zjarri, objektiv i të cilit nuk ishte vetë ai, por Kelmend Kastrati, i cili së bashku me Elton Maragaritin mbetën të plagosur (Të tre ishin në një automjet që u qëllua me armë zjarri). Hetimet dolën në përfundimin se organizator dhe financues i vrasjes ishte Ermal Binjaku. Shkak i krimit, sipas prokurorisë, ishte një konflikt i vjetër mes Binjakut dhe Kastratit.
Sipas hetimeve, Binjaku ishte vënë në dijeni se ndaj tij do të kryehej një atentat nga fisi Kastrati. Për këtë arsye, ai me ndihmën e Ylli Nazërajt, Ilir Memushajt dhe Florian Bushi përgatiti atenatin e Mbrostarit. Në atë kohë 33-vjeçari Bushi mbante detyrën e agjentit të SHISH, deri në 21 Janar 2016, ditë kur u prangos. Florian Bushi siguronte informacion për lëvizjen e Klement Kastratit objektiv i sulmit, por që vetëm u plagos. Këto informacione i kalonin nëpërmjet telefonit Ilir Memushajt, i cili ia dërgonte më pas Ermal Binjakut. Ndërsa Ylli Nezeraj kishte ndihmuar Ermal Binjakun dhe Ilir Memushajn.
Sipas raportimeve mediatike, Ermal Binjaku, është vënë në pranga në Tetor 2017. Burime zyrtare nga policia thanë asokohe se 28 – vjeçari Binjaku u paraqit rreth orës 00:47 në pikën kufitare të Kakavijës, në hyrje të Republikës së Shqipërisë. Ai deklaroi gjeneralitete të tjera, (F.B), por pas intervistimit dhe verifikimeve të bëra nga punonjësit e policisë në sitemin ‘’TIMS’’ u zbulua se Binjaku ishte person në kërkim.
Hakmarrja
Konflikti mes fiseve Binjaku dhe Kastrati kishin nisur në vitin 1994, kur i vrarë mbeti kushëriri i Klement Kastratit dhe dyshimet ranë mbi vëllain e Ermal Binjakut.
Në vitin 2000, një tjetër i afërm i Kastratit u vra në Fier. I dyshuar për këtë ngjarje ishte Ermal Binjaku.
Ngjarjet kanë mbetur të pazbardhura nga policia. Pikërisht ky konflikt duket se është pasuar nga atentati i Mbrostarit, që çoi në vdekjen e Denis Kasës dhe plagosjen e Kastratit e Elton Margaritit. Edhe atentati i sotëm, nuk përjashtohet të jetë në vazhdon e këtij historie hamarrjeje.
Vrasja e Shkëlzen Kastratit
Këtë të Hënë u ekzekutua me armë zjarri Shkëlzen Kastrati. Nga mënyra se u krye vrasja, dyshimet janë se kemi të bëjmë me një tapetat të mirëorganizuar.
Policia njoftoi se rreth orës 10:30, në vendin e quajtur “Ura e Sheqit”, një shtetas i paidentifikuar, ka vrarë me armë zjarri Kastratin, rreth të 40-tave, i cili ka qënë në automjetin tip “Benz”. Autori është larguar nga vendngjarja me një automjet tip “Range Rover”, i cili u gjet nga shërbimet e policisë i djegur, te vendi i quajtur “Mbikalimi i Baltzës”.
Nga ana e Policisë janë ngritur pika kontrolli dhe vijon krehja e zonës për të bërë të mundur kapjen e autorit, thanë burime zyrtare. Ndërkaq, burime nga vendngjarja bënë me dije se pas të shtënave, automjeti i drejtuar nga Kastrati është përplasur me një tjetër makinë në lëvizje.
Dyshohet se Kastrati është qëlluar me dy plumba. Personat e pranishëm në zonë nuk raportojnë të kenë dëgjuar të shtëna, ç’ka shton dyshimet se në atentat është përdorur një armë me silenciator.
